2023 оны 11 сарын 27-ны өдөр NEAR-ийн Ерөнхий нарийн бичгийн дарга Им Бён Жин нь Сөүл хотноо болсон “C5+K” Монгол, Төв Азийн орон нутгийн засаг захиргааны форумд оролцсон Бүгд Найрамдах Казахстан улсын Астана хотын орлогч дарга Евгений Глотов болон Астана хотын төлөөлөгчидтэй хамт үдийн зоог барьж, NEAR-ийн сурвалжлагч гишүүнээр элсэх асуудлыг хэлэлцлээ.
Ерөнхий нарийн бичгийн дарга Им Бён Жин уулзалт зохион байгуулахад туслалцаа үзүүлсэн БНСУ дахь Казахстан улсын Элчин сайд Нургалий Арстановт талархал илэрхийлсний дараа NEAR Холбоо, Холбооны сүүлийн үеийн үйл ажиллагаа, сурвалжлагч гишүүний тогтолцоо, элсэх журам зэргийг танилцууллаа. Мөн ирэх жил NEAR-ийн томоохон үйл ажиллагааны төлөвлөгөөг тайлбарлаж, Астана хотыг NEAR-ийн сурвалжлагч гишүүнээр элсэх асуудлыг идэвхтэй авч үзэхийг хүсэв.
Глотов дарга Астана хот нь Казахстан улсын нийслэл хотын хувьд олон улсын үйл ажиллагаанд идэвхтэй оролцож байгаа бөгөөд NEAR шиг томоохон олон улсын байгууллагатай хамтран ажиллах сонирхолтой байгаагаа илэрхийлэв. Тэрээр Казахстан руу буцсаны дараа NEAR-ийн сурвалжлагч гишүүнээр элсэх асуудлыг Астана хотын захирагчид танилцуулна гэдгээ мэдэгдэв.
Уулзалтад Глотов даргаас гадна БНСУ дахь Казахстан улсын Элчин сайд Нургалий Арстанов, “Астана” нийгмийн хариуцлагатай компаний ерөнхийлөгч Бауыржан Баймукаш, Астана хотын захиргааны Олон улс, хамтын ажиллагааны газрын дарга Жанар Нугуманова, БНСУ дахь Казахстан улсын Элчин сайдын яамны ажилтан Бауыржан Даутов нар оролцов.